Абай энциклопедия

Энциклопедия қазақтың ұлы ақыны, данышпан перзенті, қазақ жаңа жазба әдебиетінің негізін салушы Абай (Ибраһим) Құнанбаевтың (1845-1904) өмірі мен шығармашылық жолына арналған. Ақынның өскен – өнген  ортасы, бай мұрасы, дүниеге көзқарасы, эстетикасы, поэтикасы , қоғамдық – саяси ой –пікірлері, тағылымы, дәстүрлері жан – жақты сөз болады.

Абай Құнанбаев. Қара сөздер

Қазақ поэзиясының шыңы – Абай Құнанбайұлының мұралары халқымыз үшін өлшеусіз биік. Оның ішінде  ақынның моральдық – философиялық, қоғамдық – саяси әрі сыншылдық – сатиралық көзқарасының тұлғалы жиынтығы болып есептелетін «Қара сөздерінің» орны орасан зор. «Қара сөздер» - ақынның өз өмірін күн нұрындай қақ жарып өткен дүниетанымының, оқуы мен білімінің , амал – әрекетінің , тіршілік – арпалысының ойлы қортындысы. Ондағы ащы өмір шындығы, қаламгердің даналығы, бүкіл адамзаттық мұраттарға ұмытылысы бұл шығармаларды әлемдік ұлы туындылар қатарына апарып қосты.

Абай Құнанбаев. Қалың елім, қазағым...

Ұлтымыздың ұлы перезенті – хакім Абайдың бұл жинағына біршама өлеңдері іріктелініп алынды. Өз заманынан оза туған ақынның терең ойлары мен асыл сөздері келешек заманаларда да гауһардай жарқырап, көзі ашық көкректерге нұр болып құйыла берері хақ.            Қалың оқырман қауым Абай сөздері арқылы өз жүрегіне, өз табиғатына тағы бір үңіле  түседі деп сенеміз.

Абай Құнанбаев. Өкінішті көп өмір кеткен өтіп...

Бұл жинаққа қазақ халқының ұлы ақыны, данышпан ақыны Абайдың сыршыл лирикасымен бірге қара сөздері де беріліп отыр. Абай қазақтың жаңа реалистік жазбаша әдебиетінің негізін салған керемет суреткер ақын, кемеңгер ойшыл. Абай поэзиясы өзі өмір сүрген тұтас бір тарихи дәуірді ғана емес, кейінгі дәуірлерді де, оның ішінде бүгінгі замандағы өмір шындығын да танып – білуге үлкен септігін тигізе алады.

Абайдың мемлекеттік тарихи-мәдени және әдеби-мемориалдық қорық мұражайы

Абайдың мемлекеттік тарихи-мәдени және әдеби-мемориалдық қорық мұражайы–ақынның туғанына 95 жыл толуы қарсаңында Халық Комиссарлар Кеңесінің 1940 жылғы 1-сәуірдегі қаулысы бойынша ұйымдастырылды.
Оның негізгі қорын 1885 жылы өлкетану мұражайына Абай тапсырған заттар құрайды. Аталмыш заттардың 30-ға жуығы мұражай қорында сақтаулы.